Maialenek esan zigunez, argi zuen gurekin egin nahi zuela bere egun berezirako soinekoa. Herrikoa izanda elkar ezagutzen ginen lehenagotik ere, horri esker argi nuen bere egunerokotasunean nola janzten den eta zein gustu dituen. Maialenek pauta batzuk eman zizkidan eta konfiantza guztiarekin jarri zuen nire esku soinekoaren diseinua. Bagenekien ez zuena nahi zerbait estrabagantea, enkajeren bat nahi zuena baina tradizionalegia izan gabe.
Horrela, Maialenen morfologia aztertu eta elkarrekin gerrialderaino zenitua izango zen soinekoa egitea erabaki genuen. Gerritik behera forma sortzeko biesean moztutako gona erantsiaz.
Goialdean bihotz formadun eskotea sortu genion, korpiño moduko bat da, krepean egina eta barrualdetik forratua, estruktura emanaz. Kanpotik, berriz, kotoizko kipurra du. Gorputzalde opakoa eta sorbalda zein mauka gardenak.
Faltari dagokionez, bi kapa sortu genituen biesean moztutako krepean. Dandarra edo kola txikia du izan ere Maialenek erosotasuna zuen helburu eta horretxeren bila joan ginen diseinua sortzerakoan.
Herrikoa izateak berezi egin du prozesu guztia. Proba guztietan sekulako giroa sortu zen, etxeko emakume guztiekin etorri baitzen. Izugarri eskertzen dizugu gugan prozesu guztian izandako konfiantza Maialen, sekulako plazera izan da ibilbide guztia elkarrekin bizitzea eta ezkontza eguna hain gertutik sentitzea.
Onena opa dizugu bide berri honetan!
You must log in to post a comment.